قصيدة تتبدل الاحوال للشاعر : نور الدين مقدم

قصيدة:"تتبدل الأحوال"

                                                                        للشاعر:نور الدين مقدم

الامتحان يكون فالدنيا والدين	سنة مولانا اتصنف واترتب
اصحاب الشمال واصحاب اليمين	ما يتلاقا المر بالفرع الطيب
اهدى الحمله ترفد الخملاش[1] الشين	والمعدن الزين من غيره يرسب
زيد قدح[2] معروف بلوانه زينين	بعد الزره[3] راه يعلى ويغيب
القوبع [4]ما دير فرق يكون متين	واذا قالت درت فالواقع تكذب
الفرطاس ابقى ايصدر بوقرنين	وشويدي في شجرته طامع يحلب
دب كلاب  ايهرمبرز ترقالين	والفاهم تهداه تديه الثعلب
فالصوره تلقاه صانع روحه زين	واللي ذاقو يرهجه حتى يقلب
اتحايا والذلال ماتو قاع اسنين	بعد ما صابو الدنيا تتقلب
اللي هترف قارنوه مع الفطين	قالوا ذا زعيم كي يعرف يخطب
العايب يلهف داروله كرعين	واتصبح دليل فالناس ايدرب
قال هدة لكلاب خاوه ملمومين	عند الجيفه خيهم غير المخلب
لاه الجحش يكون له سرج وتبطين	والخيل كي كانت اعزيزه تحطب
لبغل بالصكه يحشلف لملايين	ما يرقدش الليل في راسه يحسب
الطماع ايبات في حفرات الطين	يحفر فالليل طامع فالمطلب
والقانع بالكاينه هاني ورزين	تكله في مولاه للدعوه يوجب
المشروع احضى اوبى هذ السنين	والشعار انتاعهم عمر واهرب
يوم وليله جاب لوطو من لوزين	وانسى وقت ان كان في باطه يكرب
لا تتعجب فالتسعتو رهطين	لاتتسنى خير من جرو العقرب
البرطال[5] انقب العنبه والتين	والقنفود ايبات ساري يتكركب
الحلوف على البصل ينسف واينين	لبحيره من جرته تقعد ملعب
لخيار من المال يديه اكعيلين[6]	ويقربيها حين يغراب المغرب
حتى الفار ايجيك ما تعرفش منين	لفراشات الزايخه ليها يعطب
البصيرة راحت ابقاو العينين	درك الناس اليوم فيها تتعجب
حارم روحه مادا معاه عوين	ناسي يوم الهول من أهله يهرب
سوق الدنيا ايروح تقعد لكراطين	يلعب بيها الريح والصادق يكسب
اللي ما عندوش قلب يموت سمين	والعارف تلقاه شاقي متعذب
بعد الشدة يفرج الله المعين	والأرض لي ميته راها تعشب
قادر مولانا يعز المسلمين	ويقبل خليجهم شط المغرب
ما يبقى بيناتهم باكي وحزين	ما يبقى من راه عايش متغرب
انكونوا لاباس خاوه متهنين	تطفى هذا النار الي راها تلهب
تتصافح يبرا المرض الشين	فالسنه واكتابها هذاك الطب
والحمد لله رب العالمين	العالم باللي اتجي ولي تهرب
والصلاة على النبي جد الحسنين	مول الرساله لي ذكرو يعجب

---

[1] -الخملاش:الرواسب التي تطفو فوق الماء.

[2] -زيد قدح:قوس قزح.

[3] -الزره:العاصفة الشتوية المصحوبة بالأمطار أو الثلوج.

[4] -القوبع:الطائر الصغير.

[5] -البرطال :طائر صغير يستهدف المحاصيل الزراعية في الحقول.

[6] -كعيلين:لقب يطلقه سكان بوادي منطقة البيض على الذئب.