قصيدة حرب العقول: للشاعرة بنت الواحة

قصيدة:"حرب العقول"

                                                               للشاعرة:ذهيبة جودي (بنت الواحة)      

طل الفجر ولاح خيطه واتفقهر[1]	وطلعت شمس الحق تضحك فرحانه
راح الليل ادا ظلامه وتوخر	وطفات النجمات صبحت عيانه
حبل الظلم قصير لبدا[2] يتعثر	حبل الحق طويل ديما يتعانه
هذا جيل جديد واعي متحضر	متسلح بالعلم قدام اعدانا
جار عليه القهر في بره تدبر	من حقه محروم عايش فالهانه
ثار على الفساد وبروج المنكر	وانطق:لالاللملوك الشبعانه
احنا جيل جديد بالفكر نحاور	واختلاف الراي حكمة مولانا
من حبس الإقصاء لازم نتحرر	مطلبنا مشروع ما هوش اخيانا
ما نسعى للعنف ما فيه انفكر	ما نا من الوحوش ذيك الجيعانه
حربي ما هي حرب ذرات اتفجر	لامسدس لارصاصه رنانه
لادبابه جايه قي تتكركر	لا طياره فاره وسط اسمانا
ما نطلع لجبال فيها نتستر	ما نقطع وديان عيني سهرانه
ما عندي لاشاف لاقايد يؤمر	لادوريه حاكمه ذيك الفانه[3]
حربي حرب عقول وامخاخ تفكر	هبت للتغيير قالت بركانه
سلاحي معلومات وكلام مشفر	محروسه بالكود رموز الخانه
سيد الفايسبوك ومعاه تويتر	زيد الاس ماس  مرسول احنانه
هذا جند الحرب فالوقت الحاضر	شاعوا في لوطان فرسان القانه
جنود الخفاء ما ليهم قاهر	عاهدناهم بالوفا قاع سوانا
خدام الموصاد لازم تتبخر	ما تبقاشي حاكمه تحت اسمانا
باعونا بالرخس وارضاو المنكر	والمغضوب عليه جابوه فلانا
فضحونا ما عاد فينا ما نستر	واش بقى لينا كي قل احيانا
والظالم ديما اتشوفه يتشيطر	متولع مغروم بكليمة انا
واش انت بايع المله بالبر	واش انت واكل السحت ابنانه
واش انت راكز الخيمه  بالشر	واش اتقول انهار تلقى مولانا
ذي امه بكمالها راها تهدر	ما هو واحد تحكمه لك ترسانه
ماهم زوج اذوقوهم المر	ماهم عشره ادخلوهم للزنزانه
احنا جيل جديد واعي متحضر	متسلح بالعلم قدام اعدانا
ما ناشي جياح نبكوا فالمنحر	والبكي المذلول فاتوه انسانا
نتحصن بالدين والله ما نخسر	وسنة الحبيب مخبر لدوانا
اعدونا معروف بينا يتمسخر	والغرب المشؤوم ناوي لخلانا
العولمه جابها باه اسيطر	ويا تابعها راك صارط ذبانه
اتعاهدنا بالوفى انثى وذكر	انموتوا ولا انردوا ذا الامانه

---

[1] -اتفقهر:ظهر جليا للعيان.

[2] -لبدا :دائما .

[3] -الفانه:الصنبور

قصيدة تتبدل الاحوال للشاعر : نور الدين مقدم

قصيدة:"تتبدل الأحوال"

                                                                        للشاعر:نور الدين مقدم

الامتحان يكون فالدنيا والدين	سنة مولانا اتصنف واترتب
اصحاب الشمال واصحاب اليمين	ما يتلاقا المر بالفرع الطيب
اهدى الحمله ترفد الخملاش[1] الشين	والمعدن الزين من غيره يرسب
زيد قدح[2] معروف بلوانه زينين	بعد الزره[3] راه يعلى ويغيب
القوبع [4]ما دير فرق يكون متين	واذا قالت درت فالواقع تكذب
الفرطاس ابقى ايصدر بوقرنين	وشويدي في شجرته طامع يحلب
دب كلاب  ايهرمبرز ترقالين	والفاهم تهداه تديه الثعلب
فالصوره تلقاه صانع روحه زين	واللي ذاقو يرهجه حتى يقلب
اتحايا والذلال ماتو قاع اسنين	بعد ما صابو الدنيا تتقلب
اللي هترف قارنوه مع الفطين	قالوا ذا زعيم كي يعرف يخطب
العايب يلهف داروله كرعين	واتصبح دليل فالناس ايدرب
قال هدة لكلاب خاوه ملمومين	عند الجيفه خيهم غير المخلب
لاه الجحش يكون له سرج وتبطين	والخيل كي كانت اعزيزه تحطب
لبغل بالصكه يحشلف لملايين	ما يرقدش الليل في راسه يحسب
الطماع ايبات في حفرات الطين	يحفر فالليل طامع فالمطلب
والقانع بالكاينه هاني ورزين	تكله في مولاه للدعوه يوجب
المشروع احضى اوبى هذ السنين	والشعار انتاعهم عمر واهرب
يوم وليله جاب لوطو من لوزين	وانسى وقت ان كان في باطه يكرب
لا تتعجب فالتسعتو رهطين	لاتتسنى خير من جرو العقرب
البرطال[5] انقب العنبه والتين	والقنفود ايبات ساري يتكركب
الحلوف على البصل ينسف واينين	لبحيره من جرته تقعد ملعب
لخيار من المال يديه اكعيلين[6]	ويقربيها حين يغراب المغرب
حتى الفار ايجيك ما تعرفش منين	لفراشات الزايخه ليها يعطب
البصيرة راحت ابقاو العينين	درك الناس اليوم فيها تتعجب
حارم روحه مادا معاه عوين	ناسي يوم الهول من أهله يهرب
سوق الدنيا ايروح تقعد لكراطين	يلعب بيها الريح والصادق يكسب
اللي ما عندوش قلب يموت سمين	والعارف تلقاه شاقي متعذب
بعد الشدة يفرج الله المعين	والأرض لي ميته راها تعشب
قادر مولانا يعز المسلمين	ويقبل خليجهم شط المغرب
ما يبقى بيناتهم باكي وحزين	ما يبقى من راه عايش متغرب
انكونوا لاباس خاوه متهنين	تطفى هذا النار الي راها تلهب
تتصافح يبرا المرض الشين	فالسنه واكتابها هذاك الطب
والحمد لله رب العالمين	العالم باللي اتجي ولي تهرب
والصلاة على النبي جد الحسنين	مول الرساله لي ذكرو يعجب

---

[1] -الخملاش:الرواسب التي تطفو فوق الماء.

[2] -زيد قدح:قوس قزح.

[3] -الزره:العاصفة الشتوية المصحوبة بالأمطار أو الثلوج.

[4] -القوبع:الطائر الصغير.

[5] -البرطال :طائر صغير يستهدف المحاصيل الزراعية في الحقول.

[6] -كعيلين:لقب يطلقه سكان بوادي منطقة البيض على الذئب.

حصريا على مدونة بيت القصيدة الشعبية:قصيدة الخيمة للشاعر نواصر الحاج براهيم

هذه القصيدة من روائع الشاعر الحاج نواصر ابراهيم من برزينة :

قصيدة الخيمة             

ياذا الخيمه نسولك قولي ليا	واحنايا كيفاش ذا الوقت تركناك
انت كانت كاسبتك  بدويه	من حبك دارت الريش جمالك بهاك
وأتصلح واش ضاع منك كليا	فليجك قزله صوف وشعرذاك سداك
قالت ماننساش  خيمتي عيب عليا	ويلا ضعتي ما نصيبش واش لداك
أبنات ينفضوك صبحه وعشيه	وفالبني يكسلوك يتسقم  مطواك
كي نمشي يرخسوك ما تسوى حيه	ذالجيل يهمشوك ورشيتي مقواك
قالوا ما نسكنوش هذ المخليه	جانا فيها الريح وصهاده تلقاك
خيار السكنة حواش وغرف مبنيه	فيانس ورخام حاجه ماتذاك
والتاقه فيها الزاج وانطل أنيا	نتمتع بالعطور وكحل والمسواك
هذا هو الزوخ خدمة  عصريه	والقاز مع الحيوط راه يزل شقاك
هذي هي حالتك ياقصريه	ويابدوية صحيح رانا والفناك
نرجعلك يالبيت في ذالحكايه	أبناوك في القصور والمنضر وتاك
شعار ايقصدوك بكل قصيه	الشعر الملحون زادو ليك ثناك
قصابة وطبول والى قنايه	والمداحه جميع هذا ولا ذاك
اجمايع جا لسين كاس وصينيه	وبراد الصاصبو يسربي فيه حذاك
الشعر الملحون تلقاه هنايا	القافيه وزن مافيها تشكاك
بالآلة سجلوه فرقه فنيه	وأنت يا خيمه إذاعة قاع سواك
تراث نسجلوه  يبقى ذكرايه	والجيل اللي صغير كي يكبر يلقاك

                                            الشاعر: نواصر الحاج براهيم